Shqipëria hedh hapin e parë drejt drejtësisë digjitale

Shqipëria ka hedhur hapin e parë drejt transformimit digjital të sistemit të drejtësisë me çeljen e projektit “EU for Justice: Advancing Case Management.” Gjatë një aktiviteti në Europe House në Tiranë, Ministri i Drejtësisë, Ulsi Manja, së bashku me Ambasadorin e BE-së në Shqipëri, Silvio Gonzato, dhe Ambasadorin suedez, Niklas Ström, prezantuan këtë projekt të mbështetur nga Bashkimi Europian, Suedia dhe qeveria shqiptare. Ky projekt ka si qëllim dixhitalizimin e sistemit të drejtësisë përmes implementimit të Sistemit të Integruar të Menaxhimit të Çështjeve (ICMS), që do të mundësojë trajtimin digjital të çështjeve civile, administrative dhe penale. Ky projekt synon të përmirësojë efikasitetin, transparencën dhe aksesin për qytetarët në sistemin e drejtësisë, duke e bërë atë më të shpejtë dhe më të lehtë për të trajtuar çështjet ligjore. Po ashtu, ai do të kontribuojë në avancimin e procesit të integrimit të Shqipërisë në Bashkimin Europian dhe forcimin e shtetit të së drejtës. Ministri i Drejtësisë, Ulsi Manja, theksoi rëndësinë e këtij projekti për modernizimin e sistemit të drejtësisë dhe nënvizoi se ky është një hap i rëndësishëm për realizimin e angazhimeve të Shqipërisë në kuadër të reformës në drejtësi dhe procesit të integrimit europian. Ai u shpreh: “Rrugëtimi ynë drejt BE-së bazohet në një transformim rrënjësor të sistemit të drejtësisë, që është një nga shtyllat kryesore të shtetit të së drejtës. Ky vizion i qeverisë dhe shumicës sonë parlamentare, i ndihmuar nga reforma e pakthyeshme e drejtësisë, vazhdon të mbështetet fuqimisht nga partnerët tanë strategjikë, BE dhe SHBA, të cilët na kanë sjellë në një stacion tjetër të rëndësishëm – fillimin e ndërtimit të drejtësisë digjitale.”