Shqipëria do të mirëpresë “World Law Congress Albania 2027”

Shqipëria do të jetë mikpritëse e “World Law Congress Albania 2027”, një nga ngjarjet më të rëndësishme ndërkombëtare në fushën e drejtësisë. Ky kongres prestigjioz do të mbledhë në Tiranë mbi 3,000 juristë, përfaqësues të gjykatave supreme dhe institucioneve gjyqësore nga e gjithë bota, duke e vendosur Shqipërinë në epiqendrën e debatit global mbi sundimin e ligjit dhe drejtësinë.

Marrëveshja për organizimin e kongresit u nënshkrua nga Ministri i Drejtësisë, Ulsi Manja, gjatë vizitës zyrtare në Spanjë të delegacionit shqiptar të kryesuar nga kryeministri Edi Rama. Gjatë kësaj vizite, Kryeministri dhe delegacioni shqiptar u pritën nga Mbreti Felipe VI në Pallatin Zarzuela në Madrid, ku për nder të Shqipërisë u organizua një pritje e veçantë me anëtarët e bordit të “World Jurist Association”, organizatës prestigjioze që bashkon juristë, gjyqtarë, akademikë dhe profesionistë të ligjit nga e gjithë bota.

Në këtë pritje ishin të pranishëm personalitete të njohura të drejtësisë ndërkombëtare, përfshirë Javier Cremades, President i Shoqatës Botërore të Juristëve dhe fitues i Çmimit Universal Spanjoll 2024, Cándido Conde-Pumpido, Kryetar i Gjykatës Kushtetuese të Spanjës, Stephan Harbarth, Kryetar i Gjykatës Kushtetuese të Gjermanisë, si dhe përfaqësues të tjerë të rëndësishëm të sistemit gjyqësor ndërkombëtar.

Ky kongres do të jetë një mundësi e jashtëzakonshme për Shqipërinë për të forcuar bashkëpunimin me institucionet juridike ndërkombëtare, për të ndarë përvojat më të mira dhe për të promovuar standardet më të larta të drejtësisë.

Nënshkrimi i kësaj marrëveshjeje shënon një moment historik për vendin tonë, duke e pozicionuar Shqipërinë në zemër të debateve globale për sundimin e ligjit. “World Law Congress Albania 2027” është një tjetër hap i rëndësishëm në forcimin e shtetit të së drejtës dhe në rritjen e rolit të Shqipërisë në arenën ndërkombëtare.