Ministri Naço takon Ombudsmanin e Greqisë

Ministri i Drejtësisë, z. Nasip Naço, ka pritur sot në një takim Avokaten e Popullit të Greqisë, znj. Calliope Spanou, të shoqëruar nga Avokati i Popullit, z. Igli Totozani dhe Ambasadori i Greqisë në Shqipëri, z. Leonidas Rokanas. Gjatë takimit të zhvilluar në Ministrinë e Drejtësisë u parashtruan diskutime rreth të drejtave të njeriut dhe respektimit të tyre, veçanërisht të personave të privuar nga liria, që janë një problematikë e cila duhet ndjekur me vëmendje të veçantë. Me këtë apel i është drejtuar z. Ministër znj. Spanou, duke theksuar gjithashtu se ai e ka vlerësuar gjithmonë rolin e Avokatit të Popullit në të gjitha përpjekjet që ky institucion ka bërë në ndihmë dhe në mbështetje të shtetasve shqiptarë, përfshirë ata që vuajnë dënimet në institucionet e ekzekutimit të vendimeve penale të Greqisë.

“Vizita juaj shënon një kontribut të rëndësishëm dhe ka një impakt në forcimin e marrëdhënieve mes dy vendeve tona. Unë shpreh falenderime për ju dhe qeverinë greke, që pas viteve ’90 dha një ndihmesë të madhe për shtetasit shqiptarë që jetuan në vendin tuaj dhe ndikuan në rimëkëmbjen e ekonomisë së Shqipërisë. Ne jemi të angazhuar në respektimin e të drejtave të shtetasve grekë që vuajnë dënimin në institucionet e ekzekutimit të vendimeve penale në Shqipëri, edhe pse numri i tyre është i ulët.”

Ombudsmani i Greqisë, znj. Spanou, u shpreh nga ana e saj se e sheh me interes perspektivën e bashkëpunimit mes dy shteteve tona në fushën e të drejtave të njeriut.

“Qëllimi ynë është të përshkallëzojmë bashkëpunimin mes institucioneve të Avokatit të Popullit në vendet e Ballkanit. Ne i ndjekim me prioritet zhvillimet e ndryshme në Greqi, në të cilat përfshihen edhe shtetasit shqiptarë dhe që kanë të bëjnë me respektimin e të drejtave të njeriut, që janë në fokusin e punës sonë.”- nënvizoi Spanou.

Avokati Totozani, gjithashtu, theksoi në fjalën e tij rëndësinë e bashkëpunimit të mirë të deritanishëm mes dy vendeve tona dhe në respektimin e të drejtave të emigrantëve shqiptarë në Greqi. Ai tha se bashkëpunimi dypalësh për çështjen e toponimeve ishte shumë frytdhënës dhe pozitiv, duke dhënë një zgjidhje në favor të lehtësimit të lëvizjes së qytetarëve shqiptarë që jetojnë dhe punojnë në Greqi.