Dita Ndërkombëtare e të Drejtave të Njeriut

Në kuadër të Ditës Ndërkombëtare të të Drejtave të Njeriut, Ministri i Drejtësisë, Ulsi Manja, priti në Ministrinë e Drejtësisë një grup studentësh të drejtësisë nga disa universitete të ndryshme të vendit.

Ky takim shërbeu si një platformë për një diskutim të hapur dhe frymëzues mbi çështje themelore si të drejtat e njeriut, liria e shprehjes, e drejta për informim dhe mbrojtja e të dhënave personale. Gjatë diskutimit, studentët patën mundësinë të ndajnë perspektivat dhe pyetjet e tyre mbi sfidat aktuale që lidhen me respektimin dhe garantimin e të drejtave të njeriut.

Ministri i Drejtësisë, Ulsi Manja, vlerësoi energjinë dhe përkushtimin e të rinjve, duke theksuar rëndësinë e dialogut dhe bashkëpunimit për të forcuar parimet e demokracisë dhe respektimin e të drejtave të njeriut. Ai nënvizoi rolin kritik që të rinjtë kanë në mbrojtjen dhe promovimin e vlerave demokratike, si dhe përfshirjen e tyre aktive në vendimmarrje dhe zhvillimin e politikave të qëndrueshme.

“Të drejtat e njeriut janë themeli i çdo shoqërie të drejtë dhe demokratike. Ju, studentët, jeni zëri dhe forca që mund të sjellë ndryshim për një Shqipëri më të hapur, më transparente dhe më të drejtë,” u shpreh Ministri Manja.

Ministria e Drejtësisë mbetet e përkushtuar në mbështetjen dhe fuqizimin e të rinjve, duke krijuar hapësira dialogu dhe ndërgjegjësimi për të drejtat themelore që ndërtojnë themelet e një shoqërie demokratike.

Takime të tilla janë një dëshmi konkrete e përpjekjeve për të afruar të rinjtë me institucionet, duke ndërtuar ura të forta bashkëpunimi për të ardhmen.