DEKLARATË E PËRBASHKËT E MINISTRIT TË DREJTËSISË SË REPUBLIKËS SË SHQIPËRISË ULSI MANJA DHE E MINISTRIT TË DREJTËSISË SË REPUBLIKËS SË ITALISË CARLO NORDIO - Ministria e Drejtësisë
Postuar më: 03/10/2024

DEKLARATË E PËRBASHKËT E MINISTRIT TË DREJTËSISË SË REPUBLIKËS SË SHQIPËRISË ULSI MANJA DHE E MINISTRIT TË DREJTËSISË SË REPUBLIKËS SË ITALISË CARLO NORDIO

+ -

  • Ne, Ministri i Drejtësisë i Republikës së Shqipërisë dhe Ministri i Drejtësisë i Republikës së Italisë, u takuam sot në Tiranë në kuadrin e marrëdhënieve tona të shkëlqyera dypalëshe.
    Në bisedimet tona njohëm rëndësinë e aktiviteteve të përbashkëta të nisura tashmë nga administratat përkatëse në bazë të marrëveshjeve ekzistuese të lidhura më parë. Gjithashtu vendosëm që të zhvillojmë bashkëpunimin në fushën e legjislacionit, të bashkëpunimit gjyqësor, të funksionimit të institucioneve gjyqësore, të mbikëqyrjes së profesioneve të lira, të ekzekutimit të dënimeve, të administrimit të burgjeve dhe në trajnimin e personelit të burgjeve.
    Në këtë drejtim kemi rënë dakord që të bashkërendojmë çdo përpjekje për:
    a. forcimin dhe përmirësimin e mundshëm të mjeteve të bashkëpunimit gjyqësor;
    b. zbatimin e protokolleve operative që rrjedhin nga zbatimi i konventave ndërkombëtare dhe të Bashkimit Evropian;
    c. shkëmbimin e përvojës në hartimin e akteve ligjore dhe nënligjore, në lidhje me veprimtarinë që është në kompetencën e tyre, të nevojshëm për të siguruar funksionimin dhe efikasitetin e sistemeve gjyqësore në përputhje me standardet e Bashkimit Evropian dhe të organizatave ndërkombëtare, ku marrin pjesë të dyja vendet;Në kuadrin e parashikimeve të bëra në Memorandumin e Mirëkuptimit të muajit dhjetor 2017, vendosëm t’i japim përparësi ndihmës juridike të ndërsjellë në luftën kundër krimit të organizuar transnacional dhe terrorizmit ndërkombëtar; kundër pastrimit të kapitaleve të paligjshme; në luftën kundër trafikut të paligjshëm të qenieve njerëzore dhe të drogës.
    Në sektorin e burgjeve, mirëpritëm rifillimin e transferimeve të personave të dënuar, me një kontigjent të dënuarish me kombësi shqiptare në institucionet italiane të vuajtjes së dënimit, të kthyer në Shqipëri, me shpresën e rritjes së numrit të tyre në të ardhmen. Ramë dakord gjithashtu, që administratat përkatëse të burgjeve, të vazhdojnë e t’i japin rrugë transferimit të të dënuarve në vendet e tyre të origjinës, për të zbatuar konkretisht parashikimet e Konventës së Strasburgut të vitit 1983, të Marrëveshjes dypalëshe të Mirëkuptimit, nënshkruar në Romë më 23 prill 2002, dhe të Protokollit dypalësh të Mirëkuptimit, nënshkruar në Tiranë më 15 shkurt 2017.
    Me qëllimin, për të nxitur rritjen e efikasitetit në lidhje me pikat e mësipërme, ramë dakord që të organizohen, me ndihmën dhe pjesëmarrjen e magjistratit ndërlidhës italian, takime periodike ndërmjet zyrave kompetente të administratave tona përkatëse, përgjegjëse për bashkëpunimin gjyqësor, ku të shqyrtohen raste konkrete, situata komplekse dhe çështje interpretuese që dalin edhe pas çdo ndryshimi ligjor në nivel kombëtar.
    Së fundi ramë dakord për mundësinë e përditësimit dhe integrimit të Memorandumit dypalësh të Mirëkuptimit të vitit 2017 dhe për të nisur negociatat në lidhje me temat e mëposhtme:
    i. formalizimi i parimit procedural Ne bis in idem në bashkëpunimin tonë;
    ii. paraqitja e një instrumenti për njohjen reciproke të masave kufizuese të lirive personale, të ngjashëm me urdhërarrestin evropian, i cili mund të zëvendësonte atë tradicional të ekstradimit.
    Tiranë më 3 tetor 2024